Sasive Chinnamma- ರೆಡ್ಡಿಕುಲ ಮಹಾಸಾಧ್ವಿ ಸಾಸಿವೆ ಚಿನ್ನಮ್ಮನ ಬಗ್ಗೆ ನಿಮಗೆಷ್ಟು ಗೊತ್ತು?

ದೈವಭಕ್ತಿ, ಸಾಧ್ವಿತನ ಮತ್ತು ಮಹಿಳಾ ಶಕ್ತಿಯ ಜೀವಂತ ರೂಪವಾಗಿರುವ ರೆಡ್ಡಿಕುಲ ಮಹಾಸಾಧ್ವಿ ಸಾಸಿವೆ ಚಿನ್ನಮ್ಮನ (Sasive Chinnamma) ಜೀವನ ನಮ್ಮೆಲ್ಲರಿಗೂ ಸ್ಫೂರ್ತಿದಾಯಕವಾಗಿದೆ…

ಕರ್ನಾಟಕ ಮತ್ತು ಆಂಧ್ರಪ್ರದೇಶದ ಗಡಿಭಾಗದ ಜನಪದ ಪರಂಪರೆಯಲ್ಲಿ ಕೆಲವೇ ಕೆಲವು ಮಹಿಳಾ ಪಾತ್ರಗಳು ಶತಮಾನಗಳ ಕಾಲ ಜನಮನದಲ್ಲಿ ಉಳಿದುಕೊಂಡಿವೆ.

ಉತ್ತರ ಕರ್ನಾಟಕದಲ್ಲಿ ಹೇಮರಡ್ಡಿ ಮಲ್ಲಮ್ಮ ಹೇಗೆ ಭಕ್ತಿಯ ಪ್ರತೀಕವಾಗಿದ್ದಾಳೋ, ಅದೇ ರೀತಿಯಾಗಿ ಹಳೆ ಮೈಸೂರು ಪ್ರದೇಶ ಹಾಗೂ ರಾಯಲಸೀಮೆಯಲ್ಲಿ ರೆಡ್ಡಿಕುಲ ಸಾಧ್ವಿ ಸಾಸಿವೆ ಚಿನ್ನಮ್ಮ ತನ್ನ ದೈವಭಕ್ತಿ, ಸಹನೆ ಮತ್ತು ಮಹಿಳಾ ಶಕ್ತಿಯ ಅಪೂರ್ವ ರೂಪವಾಗಿ ಜನಪ್ರಿಯಳಾಗಿದ್ದಾಳೆ.

ಮಲ್ಲಮ್ಮನಷ್ಟು ವ್ಯಾಪಕ ಪ್ರಸಿದ್ಧಿ ಇಲ್ಲದಿದ್ದರೂ, ಸಾಸಿವೆ ಚಿನ್ನಮ್ಮನ ಜೀವನಗಾಥೆ ಜನಪದ ಗೀತೆಗಳು, ವೀರಗಾಥೆಗಳು ಮತ್ತು ದೇವಾಲಯ ಪರಂಪರೆಯ ಮೂಲಕ ಇಂದಿಗೂ ಜೀವಂತವಾಗಿದೆ.

ಇದನ್ನೂ ಓದಿ: Manyakheta Rashtrakuta Capital History Neglect- ಹಾಳು ಕೊಂಪೆಯಾದ ರಾಷ್ಟ್ರಕೂಟರ ರಾಜಧಾನಿ | ವೈಭವದ ಮಾನ್ಯಖೇಟ ಈಗ ಅನೈತಿಕ ಚಟುವಟಿಕೆಗಳ ಕೂಪ!

ಕನ್ನಡ ನೆಲದ ಮಗಳು ಪಾವಗಡದ ಶೀಲಮುವಾರು ಚಿನ್ನಮ್ಮ

ಪ್ರಚಲಿತದಲ್ಲಿರುವ ವೀರಗಾಥೆಗಳು ಹಾಗೂ ಜನಪದ ಕತೆಗಳ ಪ್ರಕಾರ, ಸಾಸಿವೆ ಚಿನ್ನಮ್ಮ ಕನ್ನಡ ಮಣ್ಣಿನ ಮಗಳು. ಪಶ್ಚಿಮ ದೇಶದ ಮೈಸೂರು ರಾಜ್ಯಕ್ಕೆ ಸೇರಿದ್ದ ಪಾವುಗೊಂಡ್ಲ ಪಟ್ಟಣ (ಇಂದಿನ ತುಮಕೂರು ಜಿಲ್ಲೆಯ ಪಾವಗಡ) ಚಿನ್ನಮ್ಮನ ತವರೂರು.

ಶೀಲಮು ಕೊಂಡಾರೆಡ್ಡಿ ಮತ್ತು ಕೊಂಡಮ್ಮ ದಂಪತಿಗಳ ಪುತ್ರಿಯಾಗಿ ಜನಿಸಿದ ಆಕೆಯ ತವರು ಮನೆ ಹೆಸರು ಶೀಲಮುವಾರು. ಬಾಲ್ಯದಿಂದಲೇ ಶಾಂತ ಸ್ವಭಾವ, ಶುದ್ಧಾಚಾರ ಮತ್ತು ದೈವಭಕ್ತಿಯನ್ನು ಮೈಗೂಡಿಸಿಕೊಂಡಿದ್ದ ಚಿನ್ನಮ್ಮನಲ್ಲಿ ವಿಶೇಷವಾದ ಆಧ್ಯಾತ್ಮಿಕ ಶಕ್ತಿ ಅಡಗಿತ್ತು ಎನ್ನುವುದು ಜನಪದ ನಂಬಿಕೆ.

ಅನಂತಪುರದ ಅತ್ತೆ ಮನೆಯ ಸಂಕಷ್ಟಗಳು

ಚಿನ್ನಮ್ಮನ ವಿವಾಹವನ್ನು ಆಂಧ್ರಪ್ರದೇಶದ ಅನಂತಪುರ ಜಿಲ್ಲೆಯ ಓಲುಗೊಂಡ ಪಟ್ಟಣದ ಸಾಸಿವೆ ರೆಡ್ಡಿ ಮತ್ತು ಸಾಸಿವೆ ನಾಗಮ್ಮ ದಂಪತಿಗಳ ಮೊದಲ ಪುತ್ರ ವೆಂಗಳರೆಡ್ಡಿಯೊಂದಿಗೆ ನೆರವೇರಿಸಲಾಗುತ್ತದೆ. ಮದುವೆಯ ನಂತರ ಚಿನ್ನಮ್ಮ ಅತ್ತೆ ಮನೆ ಸೇರುತ್ತಾಳೆ.

ಇಲ್ಲಿಯೇ ಆಕೆಯ ಜೀವನದ ನಿಜವಾದ ಪರೀಕ್ಷೆ ಆರಂಭವಾಗುತ್ತದೆ. ಚಿನ್ನಮ್ಮ ವಿಷ್ಣುಭಕ್ತಳಾಗಿದ್ದರೆ, ಅತ್ತೆ ಮನೆವರು ಶೈವ ಆರಾಧಕರು. ದೈವ ಆರಾಧನೆಯ ಭಿನ್ನತೆಯೇ ಮುಂದಾಗಿ ಚಿನ್ನಮ್ಮ ಅತ್ತೆ-ಮಾವರ ಕೋಪಕ್ಕೆ ಗುರಿಯಾಗುತ್ತಾಳೆ ಎಂಬುದು ವೀರಗಾಥೆಗಳ ಸಾರ.

ಅತ್ತೆ ಸಾಸಿವೆ ನಾಗಮ್ಮ, ಮಾವ ಸಾಸಿವೆ ರೆಡ್ಡಿ, ಗಂಡ ವೆಂಗಳರೆಡ್ಡಿ, ದೊಡ್ಡ ಭಾವ ಕೋಟಿರೆಡ್ಡಿ ಹಾಗೂ ಅವನ ಹೆಂಡತಿ ಗೌರಮ್ಮ ಎಲ್ಲರಿಂದಲೂ ಚಿನ್ನಮ್ಮ ನಿರಂತರ ಪೀಡನೆ, ಅವಮಾನ ಮತ್ತು ಮಾನಸಿಕ ಯಾತನೆಯನ್ನು ಅನುಭವಿಸಬೇಕಾಗುತ್ತದೆ.

ಇದನ್ನೂ ಓದಿ: Glory of the Reddy kings of Kashmir – ಭಾರತ ಭೂಶಿರ ಕಾಶ್ಮೀರದಲ್ಲೂ ರೆಡ್ಡಿರಾಜರ ಸುವರ್ಣ ವೈಭವ

ಚಿನ್ನಮ್ಮನ ಜೀವನ ಚರಿತ್ರೆ ಹೇಳುವ ಮೂರು ರಾತ್ರಿಗಳ ವೀರಗಾಥೆ

ರಾಯಲಸೀಮಾ ಪ್ರದೇಶದಲ್ಲಿ ಗಾಥಾಕಾರರು ಹಾಡುವ ಮೂರು ರಾತ್ರಿಗಳ ವೀರಗಾಥೆಗಳಲ್ಲಿ ಸಾಸಿವೆ ಚಿನ್ನಮ್ಮನ ಸಂಪೂರ್ಣ ಜೀವನ ಚಿತ್ರಿತವಾಗುತ್ತದೆ.

• ಮೊದಲ ರಾತ್ರಿಯ ಕತೆ: ಚಿನ್ನಮ್ಮನ ಜನನ, ಬಾಲ್ಯ, ಅವಳ ಸರಳ ಜೀವನ, ವಿವಾಹ ಮತ್ತು ಅತ್ತೆ ಮನೆ ಪ್ರವೇಶದವರೆಗಿನ ಘಟನಾವಳಿಗಳನ್ನು ವಿವರಿಸುತ್ತದೆ.
• ಎರಡನೇ ರಾತ್ರಿಯ ಕತೆ: ಅತ್ತೆ ಮನೆಯಲ್ಲಿ ಚಿನ್ನಮ್ಮ ಅನುಭವಿಸುವ ದೈಹಿಕ ಹಾಗೂ ಮಾನಸಿಕ ಕಷ್ಟಗಳು, ಅವಳ ಸಹನೆ, ದೈವಭಕ್ತಿಯಿಂದಲೇ ಎಲ್ಲವನ್ನು ಸಹಿಸುವ ಮನೋಬಲವನ್ನು ಭಾವನಾತ್ಮಕವಾಗಿ ಚಿತ್ರಿಸುತ್ತದೆ.
• ಮೂರನೇ ರಾತ್ರಿಯ ಕತೆ: ಅತ್ತೆ ಸಾಸಿವೆ ನಾಗಮ್ಮ ಬಲವಂತವಾಗಿ ಚಿನ್ನಮ್ಮನಿಂದ ಜಂಗಮಾರ್ಚನೆ ಮಾಡಿಸುವುದು, ಅದರ ನಂತರ ಚಿನ್ನಮ್ಮ ಕದಿರಿ ಲಕ್ಷ್ಮೀ ನರಸಿಂಹಸ್ವಾಮಿಯ ಸ್ಮರಣೆಯಲ್ಲಿ ಲೀನಳಾಗುವುದು ಮತ್ತು ಕೊನೆಗೆ ಲಿಂಗೈಕ್ಯ (ಐಕ್ಯ) ಹೊಂದುವ ಘಟನೆ ಅತ್ಯಂತ ದ್ರವ್ಯಾತ್ಮಕವಾಗಿ ವರ್ಣಿತವಾಗುತ್ತದೆ.

ಕದಿರಿ ಲಕ್ಷ್ಮೀ ನರಸಿಂಹಸ್ವಾಮಿ ಚಿನ್ನಮ್ಮನ ಐಕ್ಯಸ್ಥಳ

ಅನಂತಪುರ ಮಂಡಲದ ಜನಪದ ನಂಬಿಕೆಯ ಪ್ರಕಾರ, ಚಿನ್ನಮ್ಮ ಕದಿರಿ ಲಕ್ಷ್ಮೀ ನರಸಿಂಹಸ್ವಾಮಿ ಸನ್ನಿಧಿಯಲ್ಲಿ ಐಕ್ಯಳಾಗುತ್ತಾಳೆ. ಇದಕ್ಕೆ ಸಾಕ್ಷಿಯಾಗಿ ಕದಿರಿ ನರಸಿಂಹಸ್ವಾಮಿ ದೇವಾಲಯದಲ್ಲಿ ಇಂದಿಗೂ ಸಾಸಿವೆ ಚಿನ್ನಮ್ಮನ ವಿಗ್ರಹವಿದೆ.

ಗೋಪುರವು ಇಂದು ಭಗ್ನಗೊಂಡ ಸ್ಥಿತಿಯಲ್ಲಿದ್ದರೂ, ಆ ವಿಗ್ರಹ ಜನಪದ ಭಕ್ತರಿಗೆ ಚಿನ್ನಮ್ಮನ ದೈವಭಕ್ತಿಯ ಸಂಕೇತವಾಗಿ ಉಳಿದಿದೆ. ದೇವಾಲಯದ ವಾತಾವರಣದಲ್ಲೇ ಚಿನ್ನಮ್ಮನ ತ್ಯಾಗ, ಸಹನೆ ಮತ್ತು ಭಕ್ತಿ ನೆನಪಾಗುತ್ತದೆ ಎಂಬ ನಂಬಿಕೆ ಜನರಲ್ಲಿ ಇದೆ.

ಇದನ್ನೂ ಓದಿ: End Caste Divisions Reddys Unity- ಪಂಗಡ ಬೇಧ ಬಿಡಿ ರೆಡ್ಡಿಕುಲವೊಂದೇ ಎಂಬ ಅಭಿಮಾನವಿಡಿ

‘ಸಾಸುವುಲು ಚಿನ್ನಮ್ಮ ಕಥ’ ಜನಪದ ಪರಂಪರೆ

ಅನಂತಪುರ ಮಂಡಲದಲ್ಲಿ ಸಂಗ್ರಹಿಸಲ್ಪಟ್ಟ ಚಿನ್ನಮ್ಮನ ಜೀವನಗಾಥೆಯನ್ನು ‘ಸಾಸುವುಲು ಚಿನ್ನಮ್ಮ ಕಥ’ ಎಂದು ಕರೆಯುತ್ತಾರೆ. ಇಲ್ಲಿ ‘ಸಾಸಿವೆ’ ಎಂಬ ಪದ ಆಕೆಯ ಅತ್ತೆ ಮನೆಯ ಹೆಸರನ್ನು ಸೂಚಿಸುತ್ತಿದ್ದು, ತವರು ಮನೆ ಹೆಸರು ಶೀಲಮುವಾರು ಎನ್ನುವುದು ವಿಶೇಷ ಅಂಶ.

ಈ ಕಥೆಗಳು ಪೀಳಿಗೆಗಳಿಂದ ಪೀಳಿಗೆಗೆ ಹಾಡಿನ ರೂಪದಲ್ಲಿ ಸಾಗುತ್ತ ಬಂದಿದ್ದು, ಮಹಿಳೆಯ ಸಹನೆ, ಧರ್ಮನಿಷ್ಠೆ ಮತ್ತು ದೈವಶ್ರದ್ಧೆಯನ್ನು ಬಿಂಬಿಸುತ್ತವೆ.

ಕನ್ನಡ-ತೆಲುಗು ಸಂಸ್ಕೃತಿಯ ಸೇತುವೆ

ಚಿನ್ನಮ್ಮ ಕನ್ನಡ ಮಣ್ಣಿನ ಮಗಳಾಗಿದ್ದರಿಂದ ಅವಳ ವೀರಗಾಥೆ ಕರ್ನಾಟಕದಲ್ಲಿಯೂ ಪ್ರಸಿದ್ಧವಾಗಿದೆ. ಒಂದು ಕನ್ನಡ ಚಲನಚಿತ್ರದಲ್ಲಿಯೂ ಸಾಸಿವೆ ಚಿನ್ನಮ್ಮನ ಸಾಧ್ವಿತನ ಮತ್ತು ದೈವಭಕ್ತಿಯನ್ನು ಚಿತ್ರಿಸಲಾಗಿದೆ. ಇದು ಕನ್ನಡ-ತೆಲುಗು ಸಂಸ್ಕೃತಿಗಳ ನಡುವಿನ ಆಧ್ಯಾತ್ಮಿಕ ಸಂಪರ್ಕಕ್ಕೆ ಉತ್ತಮ ಉದಾಹರಣೆ.

ಹೇಮರಡ್ಡಿ ಮಲ್ಲಮ್ಮನ ಜೀವನದಂತೆಯೇ ಚಿನ್ನಮ್ಮನ ಕಥೆಯಲ್ಲಿಯೂ ಪಿತೃಸತ್ವ ವ್ಯವಸ್ಥೆಯಲ್ಲಿ ಹೆಣ್ಣು ಅನುಭವಿಸುವ ಯಾತನೆ, ಆದರೆ ದೈವಭಕ್ತಿಯಿಂದ ಅವಳು ಪಡೆಯುವ ಆಧ್ಯಾತ್ಮಿಕ ಜಯ ಸ್ಪಷ್ಟವಾಗಿ ಗೋಚರಿಸುತ್ತದೆ.

ಇದನ್ನೂ ಓದಿ: Reddykula Shakhegalu- ವೈವಿಧ್ಯತೆಯಲ್ಲಿ ಐಕ್ಯತೆ ಸಾರುವ ರೆಡ್ಡಿಕುಲ ಶಾಖೆಗಳು

ಇಂದಿನ ಮಹಿಳೆಯರಿಗೆ ಚಿನ್ನಮ್ಮನ ಸಂದೇಶ

ಸಾಸಿವೆ ಚಿನ್ನಮ್ಮ ಕೇವಲ ಪೌರಾಣಿಕ ಅಥವಾ ಜನಪದ ಪಾತ್ರವಲ್ಲ. ಅವಳು ಸಹನೆಯ ಪ್ರತೀಕ, ದೈವಭಕ್ತಿಯ ಮಾದರಿ, ಮಹಿಳಾ ಆತ್ಮಗೌರವದ ಸಂಕೇತ, ಸಂಕಷ್ಟಗಳ ನಡುವೆ ಧರ್ಮ ಬಿಡದ ಶಕ್ತಿ.

ಮಲ್ಲಮ್ಮನಷ್ಟು ಪ್ರಸಿದ್ಧಿ ಇಲ್ಲದಿದ್ದರೂ, ಚಿನ್ನಮ್ಮನ ದೈವಭಕ್ತಿ ಮತ್ತು ಹೆಣ್ತನ ಇಂದಿನ ಸಮಸ್ತ ಹೆಂಗಳೆಯರಿಗೆ ಸ್ಪೂರ್ತಿದಾಯಕವಾದದ್ದು ಎಂಬುದರಲ್ಲಿ ಸಂಶಯವಿಲ್ಲ.

ಹಳೆ ಮೈಸೂರು ಪ್ರಾಂತ್ಯದ ರೆಡ್ಡಿಕುಲ ಮಹಾಸಾಧ್ವಿ ಎಂದು ಸಾಸಿವೆ ಚಿನ್ನಮ್ಮನನ್ನು ಕರೆಯುವುದು ಖಂಡಿತ ಅತಿಶಯವಲ್ಲ. ಅವಳ ಜೀವನಗಾಥೆ ಮಹಿಳೆಯ ಆತ್ಮಶಕ್ತಿಗೆ, ಧರ್ಮನಿಷ್ಠೆಗೆ ಮತ್ತು ದೈವಭಕ್ತಿಗೆ ಜೀವಂತ ಸಾಕ್ಷಿಯಾಗಿದೆ.

ಇಂತಹ ಮಹಾಸಾಧ್ವಿಗಳ ಕಥೆಗಳು ಜನಪದ ಪರಂಪರೆಯಲ್ಲಿ ಉಳಿಯುವುದಷ್ಟೇ ಅಲ್ಲ, ಮುಂದಿನ ಪೀಳಿಗೆಗೆ ದಾರಿ ತೋರಿಸುವ ಬೆಳಕಾಗಬೇಕು.

ಸಾಸಿವೆ ಚಿನ್ನಮ್ಮನ ಜೀವನ ಚರಿತ್ರೆಯ ವಿಡಿಯೋ ಇಲ್ಲಿದೆ. ನೋಡಿ ಮತ್ತು ಬಂಧುಗಳೆಲ್ಲರಿಗೂ ಶೇರ್ ಮಾಡಿ… 👇👇👇