End Caste Divisions Reddys Unity- ಪಂಗಡ ಬೇಧ ಬಿಡಿ ರೆಡ್ಡಿಕುಲವೊಂದೇ ಎಂಬ ಅಭಿಮಾನವಿಡಿ

‘ಪಂಗಡ ಬೇಧ’ (End Caste Divisions Reddys Unity) ಎಂಬುವುದು ಯಾವುದೇ ಒಂದು ಸಮಾಜ, ಸಮುದಾಯವನ್ನು ಬೇರು ಮಟ್ಟದಲ್ಲಿ ಸುಟ್ಟು ಹಾಕುತ್ತದೆ. ರೆಡ್ಡಿ ಸಮುದಾಯ ಈ ಭೇದದ ಬಲೆಯಿಂದ ಹೊರಬಂದು ರೆಡ್ಡಿಕುಲವೊಂದೇ ಎಂಬ ಮಹಾ ಅಭಿಮಾನವನ್ನು ಮೈಗೂಡಿಸಿಕೊಳ್ಳೋಣ…

ಸಮಾಜ ಜೀವನದ ಅಡಿಪಾಯವೇ ಒಗ್ಗಟ್ಟು. ಆದರೆ ದುರದೃಷ್ಟವಶಾತ್ ಇತ್ತೀಚಿನ ದಿನಗಳಲ್ಲಿ ನಮ್ಮಲ್ಲಿ ಪಂಗಡ-ಉಪಪಂಗಡಗಳ ಹೆಸರು ಹೇಳಿ, ರೆಡ್ಡಿ ಸಮಾಜವನ್ನು ಅಂತರಂಗದಿಂದಲೇ ದುರ್ಬಲಗೊಳಿಸುವ ಅಪಾಯಕಾರಿ ಪ್ರವೃತ್ತಿ ಬೆಳೆಯುತ್ತಿದೆ. ನನ್ನ ಪಂಗಡ, ನಿನ್ನ ಪಂಗಡ ಎಂಬ ಭೇದವೇ ಇಂದು ರೆಡ್ಡಿ ಕುಲ ಸಂಘಟನೆಗೆ, ನಮ್ಮಲ್ಲಿರುವ ಒಗ್ಗಟ್ಟಿಗೆ, ಸಾಮೂಹಿಕ ಶಕ್ತಿಗೆ ದೊಡ್ಡ ಸಂಕಟವನ್ನು ತಂದೊಡ್ಡುತ್ತಿದೆ.

ಮನುಷ್ಯನ ಮನಸ್ಸಿಗೆ ‘ನಾನು’, ‘ನನ್ನ ಕುಟುಂಬ’, ‘ನನ್ನ ಪಂಗಡ’ ಎಂಬ ಅಭಿಮಾನ ಹುಟ್ಟುವುದು ಸಹಜ. ಆದರೆ ಈ ಅಭಿಮಾನವೇ ಅತಿಯಾದಾಗ ಅದು ವಿಭಜನೆಯ ಬೀಜವಾಗಿ ಬೆಳೆದು ಕುಲದ ಬಲವನ್ನು ಕುಂದಿಸುತ್ತದೆ. ರೆಡ್ಡಿ-ರೆಡ್ಡಿಗೇ ಶತ್ರು ಎಂದು ಹೇಳುವ ಸ್ಥಿತಿ ಮೂಡಿದಾಗ ಸಮಾಜದ ಶಕ್ತಿಯನ್ನು ಹೊರಗಿನವರು ದುರುಪಯೋಗ ಮಾಡಿಕೊಳ್ಳುವುದು ಸಹಜ. ಆದ್ದರಿಂದಲೇ ಇಂದಿನ ಅಗತ್ಯ ‘ನಾನು ರೆಡ್ಡಿ – ನಾವೆಲ್ಲಾ ಒಂದು’ ಎನ್ನುವ ವಿಶಾಲ ಮನೋಭಾವ.

ಯಾವುದೇ ಸಮುದಾಯ ಮುಂದಕ್ಕೆ ಸಾಗಲು ಪ್ರತಿಭೆ, ಶಕ್ತಿ, ನಾಯಕತ್ವ ಬೆಳೆಯಲು ಮೊದಲ ಷರತ್ತು – ಪರಸ್ಪರ ವಿಶ್ವಾಸ, ಒಗ್ಗಟ್ಟು, ಪರಸ್ಪರ ಗೌರವ. ಪಂಗಡಗಳ ಬೇಧವನ್ನು ಬದಿಗೊತ್ತಿ ‘ರೆಡ್ಡಿಕುಲ’ ಎಂಬ ಆತ್ಮಾಭಿಮಾನದ ಹೊರೆಯನ್ನು ಹೊತ್ತಾಗ ಮಾತ್ರ ಸಮಾಜ ಜೀವಂತವಾಗುತ್ತದೆ.

ಇದನ್ನೂ ಓದಿ: Reddykula Shakhegalu- ವೈವಿಧ್ಯತೆಯಲ್ಲಿ ಐಕ್ಯತೆ ಸಾರುವ ರೆಡ್ಡಿಕುಲ ಶಾಖೆಗಳು

ಇತಿಹಾಸ ಪುಟದಲ್ಲಿ ರೆಡ್ಡಿಗಳ ಕೀರ್ತಿ

ಕೆಲವರು ‘ಕರ್ನಾಟಕದಲ್ಲಿ ರೆಡ್ಡಿಗಳ ಸಂಖ್ಯೆ ಕಡಿಮೆ’ ಎಂದು ತೋರಿಸಲು ಪ್ರಯತ್ನಿಸುವುದುಂಟು. ಆದರೆ, ಐತಿಹಾಸಿಕವಾಗಿ ನೋಡಿದರೆ ಕರ್ನಾಟಕದಲ್ಲಿ ರೆಡ್ಡಿಗಳು ಅಲ್ಪಸಂಖ್ಯಾತರಾಗಿಲ್ಲ. ರಾಷ್ಟ್ರಕೂಟರ ಪ್ರಾಚೀನ ಆಡಳಿತ, ಹೋರಾಟಗಳು, ಯಾತ್ರೆಗಳು ಈ ನೆಲದ ಮೇಲೆ ನಮ್ಮ ಕುಲದ ಆಳವಾದ ಬೇರುಗಳನ್ನು ಸೂಚಿಸುತ್ತವೆ.

ನಮ್ಮ ಸಮಾಜದ ಗಣ್ಯರಾದ ಕೆ.ಸಿ. ರೆಡ್ಡಿಯವರು ರಾಜ್ಯದ ಮೊದಲ ಮುಖ್ಯಮಂತ್ರಿಯಾಗಿ ಮೈಸೂರು ಪ್ರಜಾಪ್ರಭುತ್ವದ ಭವಿಷ್ಯಕ್ಕೆ ಮೂಲಸ್ತಂಭ ವಹಿಸಿದರು. ಸಿ.ಆರ್. ರೆಡ್ಡಿಯವರಂತಹ ಹೋರಾಟಗಾರರು ಆಂಧ್ರ-ಕರ್ನಾಟಕ ಎರಡೂ ರಾಜ್ಯಗಳಲ್ಲಿ ಬ್ರಾಹ್ಮಣೇತರ ಚಳುವಳಿಗೆ ದಿಕ್ಕು ತೋರಿಸಲಿದ್ದಾರೆ.

ನಾಲ್ವಡಿ ಕೃಷ್ಣರಾಜ ಒಡೆಯರ ಅನೇಕ ಸುಧಾರಣೆಗಳ ಹಿಂದೆಯೇ ಈ ರೆಡ್ಡಿ ಚಿಂತಕರ ಪ್ರಭಾವ ಇತಿಹಾಸ ಪುಟ ಸೇರಿವೆ. ಶೈಕ್ಷಣಿಕ, ರಾಜಕೀಯ, ಸಾಮಾಜಿಕ, ಆಧ್ಯಾತ್ಮಿಕ, ಸಾಂಸ್ಕೃತಿಕ ಎಲ್ಲ ಕ್ಷೇತ್ರಗಳಲ್ಲೂ ನಮ್ಮ ಸಮಾಜದ ಕೀರ್ತಿ ಕೆತ್ತಲಾಗಿದೆ.

ಇದನ್ನೂ ಓದಿ: Uyyalawada Narasimha Reddy- ಅಪ್ರತಿಮ ದೇಶಭಕ್ತ ಉಯ್ಯಾಲವಾಡ ನರಸಿಂಹರೆಡ್ಡಿ | ಜಯಂತೋತ್ಸವದ ವಿಶೇಷ ಲೇಖನ

ರಾಜ್ಯವ್ಯಾಪಿ ರೆಡ್ಡಿಗಳ ಪ್ರಾಬಲ್ಯ

ಕರ್ನಾಟಕದ ಐವತ್ತಾರು ತಾಲ್ಲೂಕುಗಳಲ್ಲಿ ರೆಡ್ಡಿಗಳ ಪ್ರಭಾವ ಗಟ್ಟಿಯಾಗಿದ್ದು, ಸುಮಾರು ನಲವತ್ತು ತಾಲ್ಲೂಕುಗಳಲ್ಲಿ ರಾಜಕೀಯವಾಗಿ ನಾವೇ ನಿರ್ಣಾಯಕರು. ವಿಶೇಷವಾಗಿ ಬೆಂಗಳೂರು ಮತ್ತು ಸುತ್ತಮುತ್ತಲಿನ ಪ್ರದೇಶಗಳು, ಪೂರ್ವ ತಾಲ್ಲೂಕು, ಉತ್ತರ ತಾಲ್ಲೂಕು, ಆನೆಕಲ್, ಗ್ರಾಮಾಂತರ ಬೆಂಗಳೂರು, ರಾಮನಗರ ಎಲ್ಲೆಡೆ ನಮ್ಮ ಜನರ ಬಲ ದೊಡ್ಡದು.

ಕೋಲಾರ-ಚಿಕ್ಕಬಳ್ಳಾಪುರ ಜಿಲ್ಲೆಯ ಕೋಲಾರ, ಮಾಲೂರು, ಮುಳಬಾಗಿಲು, ಶ್ರೀನಿವಾಸಪುರ, ಕೆಜಿಎಫ್, ಗೌರಿಬಿದನೂರು- ಇಲ್ಲಿ ರಾಜಕೀಯ, ವ್ಯಾಪಾರ, ಶಿಕ್ಷಣ ಎಲ್ಲ ಕ್ಷೇತ್ರಗಳಲ್ಲಿ ನಮ್ಮ ಹೆಜ್ಜೆ ಗುರುತು ಸ್ಪಷ್ಟ.

ತುಮಕೂರು, ಚಿತ್ರದುರ್ಗ, ಬಳ್ಳಾರಿ ಹಾಗೂ ದಾವಣಗೆರೆ ಭಾಗದ ಪಾವಗಡ, ಮಧುಗಿರಿ, ಚಳ್ಳಕೆರೆ, ಶಿರಾ, ಹರಪ್ಪನಹಳ್ಳಿಗಳಲ್ಲಿ ರೆಡ್ಡಿಗಳು ಮುಖ್ಯ ನಿರ್ಧಾರಕರ್ತರು, ದೊಡ್ಡ ಕೃಷಿಕರು, ಉದ್ಯಮಿಗಳು.

ಇದನ್ನೂ ಓದಿ: Reddy Mane Devaru- ರೆಡ್ಡಿಕುಲ ದೇವರುಗಳು | ರೆಡ್ಡಿಗಳ ಮನೆಯಲ್ಲಿ ಉಳಿದು ಬಂದಿರುವ ದೈವ ಪರಂಪರೆ

ಉತ್ತರ ಕರ್ನಾಟಕದ ಪಾರಂಪರಿಕ ನೆಲೆಗಳು

ಬಾಗಲಕೋಟೆ, ಜಮಖಂಡಿ, ಬಾದಾಮಿ, ನರಗುಂದ, ನವಲಗುಂದ, ಶಿರಹಟ್ಟಿ, ರೋಣ ತಾಲೂಕುಗಳಲ್ಲಿ ಕುಟುಂಬ ಹೆಸರಿನ ಆಧಾರದ ಮೇಲೆ ಗುರುತು ಬರುವುದರಿಂದ ಕೆಲವರು ‘ರೆಡ್ಡಿ’ ಗುರುತನ್ನು ಬಳಸದೇ ಇದ್ದರೂ ಸಮುದಾಯದ ಬಲ ದೊಡ್ಡದಿದೆ.

ಬೆಳಗಾವಿ, ಬಿಜಾಪುರ, ರಾಯಚೂರು, ಕಲಬುರಗಿ, ಬೀದರ್, ಕೊಪ್ಪಳ ಪ್ರದೇಶಗಳಲ್ಲಿ ‘ರೆಡ್ಡಿ’ ಪ್ರಾಬಲ್ಯ ಜ್ವಲಿಸುವ ಜ್ಯೋತಿಯಂತೆ ಬೆಳಗುತ್ತಿದೆ. ಇಲ್ಲಿ ಸಾಮಾಜಿಕ, ಆರ್ಥಿಕ, ರಾಜಕೀಯ, ಕೃಷಿ ಕ್ಷೇತ್ರಗಳಲ್ಲಿ ರೆಡ್ಡಿಗಳ ಗಟ್ಟಿಯಾದ ಪ್ರಭಾವವಿದೆ.

ಪಂಗಡ ಭೇದ – ನಮ್ಮನ್ನೇ ದುರ್ಬಲಗೊಳಿಸುವ ಆಂತರಿಕ ಶತ್ರು

ನಮ್ಮಲ್ಲಿ ದೊಡ್ಡ ಶತ್ರು ಹೊರಗಿನವರು ಅಲ್ಲ. ಪಂಗಡಗಳ ಹೆಸರಿನಲ್ಲಿ ನಮ್ಮನ್ನೇ ಒಡೆದು ಹಾಕುವ ಆಂತರಿಕ ಭೇದಭಾವ. ಉತ್ತರ ಕರ್ನಾಟಕದಲ್ಲಿ ಕೆಲವು ಪ್ರದೇಶಗಳಲ್ಲಿ ಈ ವಿಭಜನೆ ಉದ್ದೇಶಪೂರ್ವಕವಾಗಿ ಬೆಳೆಸಲಾಗುತ್ತಿರುವುದು ಕಂಡುಬರುತ್ತಿದೆ. ಕುತಂತ್ರಿಗಳು ನಮ್ಮ ಒಗ್ಗಟ್ಟನ್ನು ಕಡಿಮೆ ಮಾಡಲು ಪಂಗಡಗಳ ಹೆಸರಿನಲ್ಲಿ ಕಿಡಿ ಎಬ್ಬಿಸುತ್ತಾರೆ.

ದೇಶಾದ್ಯಂತ ಎಲ್ಲಾ ರಂಗಗಳಲ್ಲೂ ಪ್ರಬಲರಾಗಿರುವ ನಾವು ಏಕೆ ನಮ್ಮದೇ ಪಂಗಡ ಬೇಧಗಳಿಂದ ದುರ್ಬಲರಾಗಬೇಕು? ಇತರ ಅಲ್ಪಸಂಖ್ಯಾ ಜಾತಿಗಳ ನಾಯಕರು ರಾಜ್ಯ ರಾಜಕಾರಣವನ್ನು ಆಳುತ್ತಿರಲು, ನಾವು ಮಾತ್ರ ನಮ್ಮದೇ ಬೇಧಗಳಿಂದ ಹಿಂದೆ ಸರಿಯುವುದು ಎಷ್ಟು ಸರಿ? ಎಲ್ಲರೂ ಒಂದೇ ಧ್ವನಿಯಲ್ಲಿ ನಿಂತರೆ, ರೆಡ್ಡಿ ಸಮಾಜಕ್ಕೆ ಬೇಕಿರುವ ರಾಜಕೀಯ, ಸಾಮಾಜಿಕ, ಆರ್ಥಿಕ ಬಲವನ್ನು ತಡೆಯಲು ಯಾರಿಗೂ ಸಾಧ್ಯವಿಲ್ಲ.

ಇದನ್ನೂ ಓದಿ: Mo Mu Anjanappa Reddy Sahitya Samskrutika Seve- ಮೊ ಮು ಆಂಜನಪ್ಪ ರೆಡ್ಡಿ ಅವರ ಸಾಹಿತ್ಯ, ಸಾಂಸ್ಕೃತಿಕ ಸೇವೆಗಳು

ಇದು ನಾವು ಸಂಘಟಿತರಾಗುವ ಸುಸಮಯ!

ರೆಡ್ಡಿಗಳು ಒಗ್ಗಟ್ಟಾದಾಗ- ಪ್ರತಿಭೆ, ನಾಯಕತ್ವ, ಆರ್ಥಿಕ ಬಲ, ಶೈಕ್ಷಣಿಕ ಪ್ರಗತಿ, ರಾಜಕೀಯ ಪ್ರಾಬಲ್ಯ ಎಲ್ಲವೂ ಸ್ವಯಂ ಸಿದ್ಧವಾಗುತ್ತದೆ. ಪಂಗಡಭೇದವನ್ನು ಬದಿಗೊತ್ತಿ ಕುಲಾಭಿಮಾನವನ್ನು ಹೃದಯದಲ್ಲಿ ಬೆಳಗಿಸಿಕೊಂಡು ಒಗ್ಗಟ್ಟಾಗಿ ಮುನ್ನಡೆದಾಗ ರೆಡ್ಡಿಗಳಿಗೆ ಅಸಾಧ್ಯವೆಂಬುದೇ ಇಲ್ಲ.

ರೆಡ್ಡಿಗಳು ಸಂಘಟಿತರಾಗಬೇಕು. ಪರಸ್ಪರ ಕೈಹಿಡಿಯಬೇಕು. ಬೇಧ-ಭೇದಗಳನ್ನು ದೂರ ಮಾಡಬೇಕು. ನಮ್ಮ ಇತಿಹಾಸ, ಪರಂಪರೆ, ಸಾಧನೆಗಳ ಬಗ್ಗೆ ಹೊಸ ಪೀಳಿಗೆಗೆ ಅರಿವು ಮೂಡಿಸಬೇಕು. ಸಮಾಜದ ಬಲವು ರಾಜಕೀಯ, ಶಿಕ್ಷಣ, ಉದ್ಯಮ, ಕೃಷಿ ಎಲ್ಲ ಕ್ಷೇತ್ರಗಳಿಗೆ ಹರಿಯಬೇಕು.

ಒಗ್ಗಟ್ಟೇ ನಮ್ಮ ಶಕ್ತಿ, ಕುಲಾಭಿಮಾನವೇ ನಮ್ಮ ಗುರುತು, ಪಂಗಡಭೇದವಿಲ್ಲದ ಸಮರಸತೆಯೇ ನಮ್ಮ ಸಾಮೂಹಿಕ ಬಲ. ಬನ್ನಿ, ಸಂಘಟಿತರಾಗಿ, ಬಲಿಷ್ಠವಾಗಿ, ರೆಡ್ಡಿ ಕುಲದ ವೈಭವವನ್ನು ಮತ್ತಷ್ಟು ಎತ್ತರಕ್ಕೆ ಬೆಳಗೋಣ!

ಲೇಖಕರು: ಮೊ ಮು ಆಂಜನಪ್ಪ ರೆಡ್ಡಿ